Insingasing ni Camarines Sur 2nd district Rep. Luigi Villafuerte a rumbeng a mangdutok iti gobierno ti mental health counselors kadagiti amin a pampubliko a pagadalan kagiddan iti ngimmato nga insidente iti pannaka-depress ken panagkettel iti bukod a biag dagiti estudyante.
Impaganetget ni Villafuerte iti pagkasapulan ti guidance counselor, psychologists wenno aniaman a licensed mental health professional iti learning institutions manipod grade school agingga tertiary level.
Segun ken ni Villafuerte, ti addang ket tapno masigurado nga amin nga estudyante ket adda nakasagana nga access-da iti pagadalan agingga iti professional counseling, early intervention ken emotional support manipod kadagiti professional wenno eksperto.
Gagem ti House Bill 163 a napauloan a Mental Health and Digital Wellbeing for Youth Act of 2025 a maideploy dagiti licensed mental health professional kas kadagiti psychologist, guidance counselors wenno psychiatric nurses.
Dagiti nasao a professional ket maideploy iti tunggal public high school ken SUC campus iti uneg iti tallo a tawen babaen ti pannakikammayet iti Department of Education (DepEd), Department of Health ken Commission on Higher Education.
