Pinatulodan iti summons ti Commission on Elections ni Pasig City congressional candidate Atty. Christian ‘Ian’ Sia tapno pasungbaten mainaig iti disqualification petition nga impila ti Comelec Task Force SAFE gapu iti kontrobersyal nga angawna kadagiti single mom ken body shaming kabayatan ti campaign rally.
Maibasar iti kopya ti summons ti Comelec Second Division, adda lima nga aldaw ni Sia tapno sungbatan ti petisyon a naipila kenkuana.
Dagiti insawang ni Sia ket mailabsing iti Comelec Resolution No 11116 wenno Anti Discrimination and Fair Campaigning Guidelines mainaig iti 2025 midterm elections.
Immunan a pinatulodan ti poll body iti show cause order ni Sia gapu iti naibagana iti single mom ngem kunana met a paset laeng daytoy iti freedom of expression.
