Nagkiddaw ti pammakawan ni Quezon City Representative Ralph Tulfo iti publiko kalpasan a natiliw ta dimmalan ti luganna iti EDSA busway idi napan a lawas.
Ti addang ket kalpasan pay nga inungtan ken binagaan ti amana a ni Senador Raffy Tulfo ken binalakadanna nga agkiddaw iti pammakawan iti amin.
Inlawlawag ni Rep. Ralph Tulfo nga awan iti naisao wenno naaramat a nagan nga adda iti posisyon ken awan iti aniaman a panagabuso iti otoridad tapno makalusot wenno mabaybay-an iti nasao nga insidente ta inawatna kaduana ti driver-na iti tiket ken naamirisda iti kamalida.
Kinunana a nabayadandan ti mueltada ken dimmalandan ti seminar tapno maawatan pay ken maipalagip ti maipatpatungpal a linteg trapiko.
Ingkarina pay nga aramidenna amin tapno maliklikan a maulit iti kas iti nasao a kamali iti masangwanan.
