VIGAN CITY – Binalaw ni House Deputy Minority Leader ken ACT Teachers Partylist Rep France Castro ti bilin ni Presidente Ferdinand Marcos Jr nga iraman iti linawas a flag ceremonies dagiti ahensia ti gobierno ken state universities and colleges ti “Bagong Pilipinas Hymn and Pledge”.
Kiddaw ni Castro ken ni Marcos nga ibabawi ti inruarna a Memorandum Circular No 52 inaig iti self-serving ken mangipakpakita iti tugot ti Martial Law nga impatungpal ti amana.
Segun iti kongresista, imbes a kastoy a gimmick ti ar-aramidenna, nasken nga ilaban koma ti administrasyon Marcos ti orasna a pagpanunoten ken tignayan no kasanoda a marisut dagiti parikut ti umili.
Kangrunaan a dinakamat ni Castro ti ingangato ti sueldo, panaglaka ti presyo dagiti magatang, pangtulong kadagiti drayber ken operator a saan a maawanan iti pagsapulan ken panangbukel kadagiti kalidad ken regular a trabaho iti pagilian.
