Impaganetget ni Davao City Rep. Paolo Duterte a saan a makasubli iti Pilipinas ni dati a Pres. Rodrigo Duterte agingga a ni President Ferdinand Marcos Jr. ti presidente.
Segun ken ni Rep. Duterte, agkarkararag ti pamiliana nga iti masangwanan ket makasubli iti Pilipinas ti dati a presidente ngem iti agdama ket kaykayatna nga agtalinaed idiay The Hague, Netherlands agingga ni Marcos iti presidente.
Kinunana pay a nasayaat iti kasasaad ti dati a presidente, nanayunan ti timbangna no man pay nakuttong latta ti sakana ta agkurang iti ehersisyo.
Agtultuloy pay a matartaripato iti ICC detention facility bayat nga ad-adalen ti Pre-Trial Chamber ti kasona maipanggep iti war on drugs.
Indanon pay ti kongresista ti panangallukoy ti dati a presidente dagiti Pilipino ken military a suroten ti konstitusyon ken salakniban iti pagilian.
