Inawagan ni Akbayan Rep. Chel Diokno kas maysa a dakkel a biddut ti gobierno ti pagilian ti saanda a panangisubli ken ni Zaldy Co.
Dayta ket kasaruno ti kumpirmasion ti Department of Justice nga awanen iti kustodia dagiti otoridad iti Czech Republic ti dati a kongresista nga itan ket maysa a pugante.
Segun ken ni Diokno, makapadismaya ti napasamak, ken nasken nga ilawlawag daytoy ti gobierno.
Masapul pay a masigurado ti gobierno kadagiti Pilipino nga ar-aramidenda ti amin tapno matunton ni Co ken maisubli iti pagilian iti kabiitan a panawen.
Immunan nga inwaragawag ni Presidente Ferdinand Marcos Jr. a nakemmeg ni Co isu a nagturong met iti nasao a pagilian ti maysa nga special team nga idaulwan ni Department of Justice Sec. Frederick Vida ngem saanda a nadanonan ti pugante iti kustodia dagiti Czech authorities.
