Nangipila ti gakat ni Leila de Lima a mangibagi ti Mamamayang Liberal Party-list tapno mangisayangkat iti nalawa a review ken reporma iti justice system iti pagilian.
Iti salinong ti House Bill No. 7635, mabukel ti maysa a komisyon a mangadal ti wagas iti panag-imbestigar, panag-usig ken panagkeddeng dagiti kaso pakairamanan dagiti maipanggep iti public officials ken nakaru a korapsyon.
Gagem pay a mangirekomendar dagiti addang tapno agbalin nga efficient, transparent ken accountable ti sistema.
Segun ken ni de Lima, ti nabuntog ken nadaras a maimpluwensyaan a sistema ti hustisya ket mangpakapsot iti demokrasya ken rule of law kangrunaan no mariribok iti panangsungbat kadagiti kaso nga adda pakainaigan ti korapsyon.
Isayangkat ti komisyon dagiti panagdenggeg iti agduduma a paset iti pagilian ken agkonsulta iti hudikatura, law enforcement, civil society, pribado a sektor, ken marginalized sectors.
Impaganetget ni De Lima a kasapulan a maisarra dagiti legal loopholes tapno maliklikan ti panagabuso ken maisubli ti talek iti publiko iti justice system.
