VIGAN CITY – Kinumpirmaranen ti pamilia Aquino ti pannakatay ti maikasangapulo ket lima a presidente ti pagilian a Benigno “Noynoy” Aquino III gapu ti renal disease secondary to diabetes.
Alas sais y media iti agsapa a natay bayat ti pannaturog ti tawen innem a pulo ket maysa dati a presidente idiay Capitol Medical Center kas pinasingkedan ti kabsatna a ni Aurora Corazon “Pinky Abellada”.
Sakbay ti pandemya ket agkarasublin iti ospital ti dati a presidente gapu ti saksakitenna ket nupay kasta, nagyaman ti pamilia Aquino kadagiti nangsupsuporta ken ti naayat a panagserbina kadagiti Pilipino idi panawen ti administrasyonna kasta payen dagiti gagayyem, padi ken doktor a nangag-agas kenkuana.
Para kadagiti kakabsatna a da Pinky, Ballsy, Viel ken ni Kris, ibilangda a prebilehio a maaddaanda iti kabsat a kas ken ni Noynoy ket kalikagumda nga agbalin a naragsak iti sidong ti nagannakda.
Iti agdama, nakahalf-mast ti Malakanyang kas panangipasimudaag ti pannakipagladingitda iti ipupusay ti dati a presidente.
