Remittance center idiay Sta. Maria, sinerrek dagiti holdaper

VIGAN CITY – Naiyalarma kadagiti kabangibang a police station iti napasamak a robbery holdup ti maysa a remittance center idiay Brgy. Poblacion Sur, Sta. Maria idi naminsan nga aldaw, alas dyes iti rabii.

Maibasar iti report ti Sta. Maria municipal police station, immasideg dagiti saan pay a nabigbig a suspek kadagiti biktima a da Siegrid Punzalan Bartolome nga agtawen ti tallo pulo ket innem, branch manager ti MLhuillier ken ni June Agustin Cabus nga assistant branch manager nga adda iti counter iti nasao a remittance center ket pinaturungan da ida ti paltog sa da inbaga nga iruwar da dagiti alahas ken kwarta.

Agsipud iti buteng da Bartolome kenni Cabus, inyawat da dagiti alahas ken kwarta a tallo ribo a pisos kadagiti suspek nga insigida a naglibas kalpasan iti pasamak.

Ti agdama, manarimaan pay laeng iti imbestigasyon dagiti otoridad iti napasamak tapnu maamuan nu siasino dagiti suspek.