VIGAN CITY – Temporaryo a naisardeng idi kalman iti panangipatulod ti National Disaster Risk Reduction and Management Council (NDRRMC) iti relief support idiay Itbayat, Batanes gapu ti Bagyo Hanna.
Ti pannaki-uman ti Bombo Radyo Vigan, inbaga ni NDRRMC- Office of the Civil Defense spokesman Mark Timbal nga awan iti rumbeng a pagdanagan dagiti agindeg idiay Itbayat ta makanay met dagiti relief support a naggapu ti LGU- Itbayat, provincial government ti Batanes at dagiti immunan nga inpatulod ti NDRRMC uray nu temporaryo a maisardeng iti panangipatulod da ti relief support kadakuada.
Malaksid kadagiti relief items, agas, sanitation and hygiene kits, nakaipatulod payen ti NDRRMC kadagiti enclosed tents a mabalin nga usaren dagiti agindeg idiay Itbayat a saan pay a makaawid kadagiti pagtaengan da tapnu saan da a matudwan gapu ti bagyo.
Inpasigurado met iti opisyal a saan laeng a dagiti taga- Itbayat iti nakasagana a tulungan iti gobyerno ngem ketdi pati dagiti sabali pay nga agnanaed idiay Batanes a mabalin a maapektaran iti nasao a bagyo ken dadduma pay a didigra.
