Inikkaten ti Land Transportation Office ti registration fee para kadagiti top box saddle bag tapno maksayan ti gastos dagiti rider a mangnamnama iti motorsiklo para iti pagbiaganda.
Segun iti LTO, naipatungpal ti addang kasaruno ti pammilin ni Presidente Ferdinand Marcos Jr. ken ni Acting Transportation Secretary Giovanni Lopez a kissayan ti financial burden dagiti motorcycle rider, nangruna dagiti delivery rider ken dadduma pay a mangmangged nga agar-aramat iti motorsiklo para iti trabahoda.
Impasardengen ti ahensia ti panagsingir iti P100 a registration fee para iti kada top box wenno saddle bag.
Nupay kasta, mandatory latta ti registration ti amin a custom-made motorcycle accessories tapno masigurado ti roadworthiness, kinatalged ken panagsurot kadagiti pagannurotan ti ahensia.
