VIGAN CITY – Binilin ti Department of Health dagiti regional offices da tapnu imonitor da iti implementasyon ti Nationwide 4 o’clock habit kontra dengue kagiddan iti deklarasyon ti Nationwide Dengue Epidemic.
Ti nationwide 4 o’clock habit ket isu iti addang ti DOH a nu dumteng iti alas kwatro iti malem ket masapul a maibelleng dagiti naurnong a danum kadagiti mabalin a pakaurnungan na tapnu saan a pagitlogan dagiti lamok a mangitunda ti dengue.
Malaksid kadagiti regional offices ti DOH, kakinnammayet da iti implementasyon ti nasao a kampanya dagiti local a gobyerno babaen iti panangbilin kadakuada ti Department of Interior and Local Government kas pinasingkedan ni Health Undersecretary Eric Domingo iti pannaki-uman kenkuana ti Bombo Radyo Vigan.
Inlawlawag na nga agpatingga laeng iti nasao a deklarasyon nu makita danton a nababan iti kaso ti dengue kadagiti naduma-duma a lugar ditoy pagilian.
Inulit iti opisyal ti inbaga ni Health Secretary Francisco Duque III nga uray nu maisubli ti dengvaxia vaccine iti merkado ket saan danto met laeng nga usaren ta saan met a napaneknekan a makatulong tapnu maparmek iti sakit a dengue.
