Rebranding iti 4th Impact, mabigbigen a “4Sisters”

Naragsak nga imbingay ti Filipino girl group iti 4^th Impact ti rebranding-da kas “4Sisters” a mangipasimudaag ti panagbalinda nga agkakabsat ken agtultuloy a panagaramid ti musika kas maysa a pamilia.

Gagem ti baro a nagan nga ipakita ti pudno nga identity-da kas agkakabsat a da Almira, Irne, Mylene ken Celina Cercado iti baet iti dadduma a nagan nga ar-aramatenda iti karera.

Karaman dagiti dati a nagan ti grupo ti Cercado Sisters, Gollayan Sisters, MICA ken 4th Power ken 4^th Impact a segun kadakuada ket tunggal maysa ket adda napateg a paset iti panagdalyasatda ti industria iti musika.

Inlawlawag ti grupo a ti 4Sisters ket mangibagi iti pudno a biag iti ruar ti entablado ken saan laeng a kadagiti performance-da kas artista.