VIGAN CITY – Burburtia pay laeng kadagiti pannakabagi ti linteg ti Sugpon Municipal Police Station no apay a nagpakamatay ti kaduada a ni PSSgt. Romeo Madrigal a taga-Pantay Tamurong, Caoayan.
Iti pannaki-uman ti Bombo Radyo Vigan ken ni PLt. Gery Arzabal, February 16 idi nadakamat ti biktima nga adda mangsursurot kenkuana no mapan agtrabaho wenno agawid ken maysa payen ti sakitna iti puso a mangpadpadagsen ti riknana.
Malaksid ti dayta, adda pay mangkweskwestyon kenkuana no kasano a nakagatang iti luganna numan pay kasdiay pay laeng ti ranggona.
Kabayatanna, inlawlawag ni Arzabal nga awan ti nangpangta iti biktima ngem no maminsan ket madlawda nga agbaliw-baliw ti galadna ken awan ti nadakdakamatna a parikut iti pamiliada.
Alas tres kinse iti parbangon a rimuar iti istasyonda ti biktima a napan iti simbaan numan pay isuda ket naka-office quarantine ta positibo iti maysa a kaduada ngem nupay kasta, pinabantayan ni Arzabal iti kabatch na a nakaduty iti istasyon ti biktima ta nadlawna a madi ti tignayna.
Naimatangan ti nangsurot kenkuana nga on-duty personnel ti nasao nga istasyon nga adda katintinnawag ti biktima ken iggemnan ti paltogna ket idi gandatenna nga alaen, nagunget ken pinapanawna ta amangan no mairaman.
Nagsubli iti istasyon tapno agpatulong ti ka-batch na a pulis a nangsurot kenkuana ngem idi makadanun, nangngegandan iti dua a putok iti paltog.
