Napalaus ti panagyaman iti Namarsua, pamilia ken gagayyemna ni Atty. Lovelyn Joyce Quebrar iti UP College of Law graduate iti panagbalinna a rank 6 iti 2024 Bar examinations.
Iti pannaki-uman ti Bombo Radyo Vigan ken ni Quebrar, arigna saanna pay laeng a patien ti panagbalinna a topnotcher ta ti laeng inkararagna ket makapasa.
Malaksid pay dayta iti dua a bulan laeng a panag-review na ken kinakurang dagiti material nga inaramatna.
Working student ni Quebrar isu a naisakripisyo ti orasna iti pamilia ken ti social life-na ta iti rabii ket isu ti panagbasana iti kina-abogasya.
Aminado a napanunotanna met ti sumuko gapu kadagiti demands ti law school ngem pinanunotna a kasapulan laeng a talaga ti dedikasyon ken kinagaget.
Malaksid iti panagbalin a rank 6 ni Quebrar ket isu pay ti rank 5 iti University of the Philippines.
