VIGAN CITY – “Dream come true” para iti maysa a graduate iti Christian Colleges of Southeast Asia a ni Javerson Luquina ti panagbalinna a topnotcher iti Licensure Examination for Professional Teachers ita a tawen.
Iti exclusive interview ti Bombo Radyo Vigan ken ni Luquina, saan a nakapap-papati para kenkuana ti panagbalinna a Rank 1 ta kalpasan idi ti exam ket madanaganen gapu iti kinarigat ti exam.
Gapu dayta, inkararagna laengen a makapasa ta naksayanen ti expectation-na numan pay arapaapna ti agbalin a topnotcher.
Balakadna a no kayat ti pumasa iti aniaman nga eksaminasyon ket masapul nga i-commit ti bagi, mangituding ti schedule a panagreview ken ilaksid dagiti banag a makadadael iti focus kas ti social media.
Ni Luquina ti umuna pay laeng a registered teacher iti pamiliada ta isuna laeng ti nakaturpos iti kolehio kadakuada nga agkakabsat.
