VIGAN CITY – Nangrugin ti Raniag Night Market iti sangwanan ti Vigan City Public Market kas paset iti selebrasyon iti syudad ti Raniag Twilight Festival nga agpatingga inton October 29 ngem awan to iti aglako inton piyesta dagiti minnatay agsipud ta mapan da kadagiti kamposanto.
Maragsakan ni Vigan City Cooperative Officer Hermie Etrata agsipud ta idi rabii ket adun dagiti tattao a napan naggatang ti naduma-duma a lako a nakaiplastar iti nasao a night market, pakairamanan dagiti street foods ken dadduma pay a makan.
Ngem namnamaen ni Etrata a kadagiti sumar-saruno nga aldaw a pannakaisayangkat ti night market ket ad-adun to pay dagiti mapan aggatang ken agiplastar iti lako da ta adu pay laeng iti bakante a mabalin da a pagpuwestoan.
Binalakadan na met dagiti aglaklako a ti pangalaan da iti danum a pagtempla ken pangluto da kadagiti lakoda ket masapul nga aggapu laeng ditoy syudad ken saan nga aggapu iti sabali tapno masigurado ti kinadalus dagiti ilakoda.
Dua gasut a pisos iti inaldaw a bayadan dagiti aglaklako para iti puwesto da iti night market agingga inton October 29 ta isu met laeng iti pagbayad ti city government iti kuryente nga usaren da.
