Inwaragawag ni Bangsamoro Grand Mufti Sheikh Abdulrauf Guialani a mangrugi ti Ramadan iti pagilian inton Pebrero 19, 2026 kalpasan nga awan ti nakita a crescent moon iti naisayangkat a moon shighting iti nadumaduma a paset ti pagilian.
Gapu dayta, ti Pebrero 18 ti maika-30 nga aldaw ti Shaaban, ken kabigatanna ti umuna nga aldaw ti panagayuno.
Ti Ramadan ti maika-siam a bulan ti Islamic (Hijri) calendar ken panawen ti panagayuno ken panagkararag, a dagiti Muslim ket saan a mangan wenno uminom manipud iti isisingising agingga ilelennek ti init.
Mailaksid iti panagayuno dagiti masakit, masikug wenno agpaspasuso, ken babbaket wenno lallakay no daytoy ket makapadakes iti salun-atda.
Ti panagleppas ti Ramadan ket mamarkaan babaen iti panangrambak iti Eid al-Fitr a maidekdeklarar met laeng maibasar iti moon sighting.
