VIGAN CITY – Rabii iti panagited ti Vigan City government ti tulong kadagiti naapektaran ti enhanced community quarantine gapu ti COVID-19 ditoy syudad tapnu makontrol dagiti tattao ta segun ken ni Mayor Juan Carlo Medina, nu bigat wennu aldaw iti panagiwaras da ket posible a darupen dagiti tattao dagiti agiwarwaras iti tulong.
Inlawlawag ni Medina a saan da a mapag-gigiddan a warasan dagiti Bigueño a naapektaran ti ECQ agsipud ta awan iti listaan da kadagiti mangmangged a nu agsarran dagiti pagsapulan da ket awanen iti sabali a pamastrekan da.
Agsipud iti dayta, sagsaggaysaen nga ivalidate ti City government dagiti kalugaran da a makaawat ti PHP 4,000 a tulong pinansiyal para iti makabulan a gastusen ti maysa a pamilya.
Nu la ketdi mapaneknekan dagiti validators nga awan iti sabali a pamastrekan ti maysa a tao malaksid iti nagsarra a pagsapulan na gapu ti ECQ, sigurado a maikkan ti tulong pinansiyal.
Saan a nairaman iti programa ti city government dagiti agtrabtrabaho iti gobyerno ta adda met latta suweldo da uray nu awan trabaho da ken dagiti miyembro ti Pantawid Pamilyang Pilipino program ta adda iti tulong kadakuada nga aggapu ti national government.
Dagiti business owners ket maud-udi danto a maikkan nu mapaneknekan a ti laeng naapektaran a negosyo da iti pamastrekan da.
Ti agdama, mapatta-patta nga umaboten ti PHP 16 milyon iti naiwaras ti city government kadagiti agarup 4, 000 a pamilya manipud kadagiti 39 barangays ti Vigan ngem adda pay iti nakasagana a PHP 20 milyon a maiwaras to.
