Sumangsango iti baro nga imbestigasyon ti R&B singer a ni R. Kelly gapu iti kaadda iti phone number ti retirado a wardern iti federal lockup-na idiay North Carolina.
Segun ti abogadona a ni Beau Brindley, nangrugi iti parikot idi nairaman isuna ti mentor program a tumultulong iti panangtarabay iti sumagmamano kadagiti inmates.
Mapapati a nakabantay idi ti warden ket sakbay a pimmanaw ket imbatina ti cellphone number-na a mabalin a matawagan no kas bilang adda dagiti inmates a kayatna nga agkiddaw iti pammagbaga.
Ngem natiliwan ti padana nga inmates nga addaan iti cellphone a nainget a maiparit iti pagbaludan.
Iti napasamak a panagsukimat dagiti otoridad ket nakitada ti notebook ti singer a nakaisuratan ti numero ti retirado a warden.
Gapu iti insidente ket naipan ni Kelly iti Special Housing Unit bayat nga im-imbestigaran dagiti otoridad.
Maipalagip nga idi 2021 ket na-convict ni Kelly idiay New York kadagiti kaso a racketeering, bribery, illegal sex kadagiti menor de edad ken sumagmamano a federal offenses ken nasentensyaan iti tallopulo a tawen a pannakaibalud.
