VIGAN CITY – Maisardeng pay laeng ti quarry operation idiay Barangay Lingsat, Bantay para ti ocular inspection gapu kadagiti reklamo a saan a naikonsulta nga immuna iti barangay.
Segun ken ni Jaylord Padron, maysa kadagiti nagreklamo, January 21 ket madaman ti quarrying operation-da iti lugar ket idi laeng February 6 nga adda ti resolusyon.
Inlawlawag ni Sangguniang Bayan Member Hipolito Madriaga nga idi December a nagaplikar iti clearance ni Engr. Teresa Palomares ket idi Enero a naaprubaran ti provisional permit manipud munisipio ta kompleto met dagiti requirements-na.
Napanunotan ni Barangay Captain Gilbert Herrera ti nagpa-rechannel ta kayatna met a maprotektaran dagiti proyekto ken nakapagpapatangda met dagiti kakaduana nga opisial nga ipakaammoda kadagiti kalugaranda ngem kuna met dagiti agrekreklamo nga awan ti naidanun kadakuada.
Kabayatanna, pinasingkedan ni PENRMO Edgar Yabez a kompleto met ti papeles wenno dagiti requirements para iti quarry operation ngem gapu iti napasamak ket husto laeng a maipasardeng pay laeng ti nasao nga operasyon tapno maisayangkat ti inspeksyon.
Inlawlawagna a masapul latta met ti public consultation para kadagiti kastoy a bambanag tapno mangngegan ti kalintegan ti tunggal maysa nga umili.