Mangrugi ita nga aldaw, Mayo 15, 2025 ket maiteden ti midyear bonus kadagiti mangmangged iti gobierno, agraman dagiti sibilyan, militar, ken uniformed personnel.
Ti bonus ket katukad iti maysa bulan a sueldo dagiti kwalipikado nga empleyado.
Nailatang ti P63.69 bilion a pondo para iti nasao a banag – P47.58 bilion ket para kadagiti sibilyan ken P16.10 bilion met para kadagiti militar ken uniformed personnel.
Naiteden ti badyet kadagiti ahensia ken lokal a gobierno sipud pay idi Enero tapno maisagana ti pannakaiwarasna.
Dagiti kwalipikado nga empleado ket nasken a nakapagtrabaho iti saan a nabab-baba ngem iti uppat a bulan sipud Hulyo 2 idi napan a tawen agingga Mayo 15 ita a tawen, ken agtultuloy nga agtrabtrabaho iti gobierno.
Sakop ti midyear bonus ti amin nga empleado ti gobierno, permanente man wenno temporary, contractual, kadagiti amin a sangay ti gobierno uray dagiti militar ken uniformed personnel manipud iti nadumaduma nga ahensia.
