Dagus nga inlawlawag ti Quezon City local government nga awan ti saan da a pinatgan a permit para iti panagummong inton Pebrero 25 kagiddan ti maika-40 nga anibersaryo ti People Power Revolution.
Segun ken ni Retired Gen. Elmo San Diego, hepe ti QC Department of Public Order and Safety (DPOS), naikkan ti permiso ti panangipatakder ti common stage iti People Power Monument nga inorganisar ti Trillion Pesos March Movement.
Adda sumagmamano a grupo a nagkedked a sumali iti maymaysa a programa ken pinili da nga agisayangkat ti maisina a kilos protesta idiay EDSA Shrine.
Inlawlawag ni San Diego a saan a sakop ti Quezon City ti EDSA Shrine isu a ti panangted ti permiso ket nakadepende iti Mandaluyong LGU ken Eastern Police District.
Kabayatanna, naikeddeng nga agisayangkat ti “Prayer Power ti EDSA’ iti EDSA Shrine nga idauloan dagiti church leaders ken civic groups.
