VIGAN CITY – Natay ti maysa a lalaki a pinaltugan ti riding-in-tandem idiay Baranagy 5, Vigan City iti mismo aldaw ti panagkasangayna.
Nabigbig ti biktima a ni Marrione Quemado Tugade, agtawen iti duapulo ket walo, insurance agent, taga-Barangay Don Alejandro, Caoayan, putot ti dati a mayor iti ili ti Caoayan a ni Mario Tugade.
Manmanehuen ti biktima ti luganna a Ford Everest idin ta adda ti riding-in-tandem a nagsardeng iti batogna ket pinaltuganda iti namindua a daras.
Nagsagaba iti tama ti paltog ti ulo ken dadduma pay a paset ti bagi ti biktima a puon ti nakatayanna idinto a ti natalged met ti kasasaad ti kaduana iti uneg ti lugan.
Natakuatan pay a limmaban a konsehal idi iti ili ti Caoayan a nakagun-od iti 3,880 a botos idinto a maikasiam met idi 2022 elections a maikadua a gundawayna a limmaban a nakagun-od iti 4,297 a botos.
Iti pannaki-uman ti Bombo Radyo Vigan ken ni Police Provincial Director Darnell Dulnuan, nasayaat met ti taray ti imbestigasyonda iti agdama ta adda dagiti naaladan nga ebidensya ken footages a mabalin a makatulong iti inda panangduktal no ania ti motibo ti pannakapaltog ti biktima.
