Indaulwan ti drag artist a ni Pura Luka Vega ti sakramento ti komunyon iti Open Table Metropolitan Community Church idiay San Juan City, iti maysa kadagiti seremonia a naisayangkat idi June 14.
Ti Open Table MCC ket maysa nga ecumenical Christian church a nakapokus iti panangted iti espiritwal a suporta ken serbisio kadagiti miembro ti LGBTQIA+ community.
Karaman daytoy iti Metropolitan Community Churches, nga adda congregation-na iti nadumaduma a pagilian.
Segun iti simbaan, gagem daytoy a panagtitipon nga ipaganetget ti espasio ti LGBTQIA+ community iti uneg ti pagkararagan.
Maipalagip a nagbalin a kontrobersyal ni Vega kalpasan ti drag performance-na a nangtulad ken ni Hesukristo ken tinuladna ti kanta nga “Ama Namin”.
Gapu dayta ket nakemmeg idi Oktubre 2023 gapu iti kaso a cybercrime, ngem nawayawayaan ta nagpiansa idi Marso 2024 ken naabsuelto iti Hunyo 2025.
