VIGAN CITY – Tinungpal latta ni Police Corporal Joel Callejo ti karina a pakasaran ti asawana no makapasngay numan pay daytoy ket pimmusayen gapu iti breast cancer, ket uray ti anakda ket saanen a nakalasat.
Iti pannaki-uman ti Bombo Radyo Vigan ken ni PCPL. Callejo, idi Oktubre 18 wenno ti maikawalo nga aldaw a pannakaimasayag ti bangkay ti asawana ket isu met ti panagpakasarda babaen iti am-ammona a pastor.
Kunana a ti anakda ket na-infect iti uneg ti tyan ti inana gapu ti panagwaras ti cancer iti bagina ta uray ti dalemna ket naapektaran pay.
Nupay kasta, dagiti kabagyan ken gaggayemna ita ti pangal-alaanna ti pigsa ta kunana a numan pay maiturogna met gapu iti puyat ken bannugna ngem no makariingto manen ket kwestyonarenna ti bagina ken uray ti Dios no apay nga isu pay laeng iti nakapasamakanna ti kastoy karigat a padas.
Sangapulo ket uppat a tawen ti panagdendennada sipud 2009 ket nabayagda met nga inur-uray a maaddaanda iti anak ngem innala met laeng ti Dios kenkuana.
