Nakemmeg ti maysa a police personnel gapu iti panagprobokar ken panagpangtana a pumatay iti maysa a chief of police idiay Barangay Mission, Nagbukel, Ilocos Sur.
Iti pannakiuman ti Bombo Radyo Vigan ken ni PMAJ Alberto Ramos Jr., ti suspek ket agtawen ti uppat a pulo ket uppat, naka-destino iti Narvacan Municipal Police Station, residente iti ili Nagbukel.
Nangrugi ti insidente kalpasan a nakaawat ti Nagbukel Municipal Police Station iti report maipapan kadagiti tallo a nagsasaruno a putok ti paltog iti Ambarangan Waterfalls.
Nagresponde dagiti kameng ti Nagbukel MPS ket nagsaludsod da kadagiti adda iti lugar ngem imbagada nga awan ti nangeg da a putok ti paltog.
Nupay kasta, nagdamag pay dagiti pulis kadagiti napan nagdidigus, bisita ken barangay officials ket naammuan a sumagmamano kadakuada ti pimmanaw gapu ti butengda iti suspek a mapapati a nakainom iti arak ken agibansa-bansag kadagiti nadumaduma a bambanag.
Nasarakan ti suspek nga isu laengen ti adda iti waterfalls nga adda dunor iti mugingna isu nga imbilin ni PMAJ Ramos kadagiti kakaduana a tulonganda a bumangkag ken ipan iti natalged a lugar.
Bayat a tultulungan dagiti pulis ti suspek, saan a nangipangpangag, ken pinangtaana ni PMAJ Ramos a patayenna, kasta pay a kinugtaranna ti maysa pulis.
Gapu ti agresibo a tignay ti suspek, kinemmeg dagiti kapulisan ket sangwenna ti kaso a grave threat, direct assault, ken resistance and disobedience.
