VIGAN CITY– Kasapulan a maipakta iti psychiatrist ti maysa a pulis iti Salcedo Municipal Police Station iti Ilocos Sur a nagpaputok ti paltog iti uneg ti istasyon gapu ta patien na nga adda mangpatay kenkuana.
Segun kenni PSInsp. Leonilo Ancheta, hepe ti Salcedo-MPS, riniing ni P02 Rolly Dizor, agtawen ti 38 , naasawaan ken taga Brgy. Nagtupacan, San Vicente dagiti kakadwa na iti katenggaan iti rabii ta nakita na kan dagiti mangpatay kenkuana ngem di rimuar da ket awan iti nakita da a sabsabali.
Kalpasanna ket nagpakada ni Dizor a mapan iti banyo nga iggem na iti service firearm na idi bigla a nakanggeg da iti putok ti paltog manipud iti uneg.
Nupay saan a nadangran, naitaray iti ospital iti nasao a pulis gapu iti panagpigerger na sa naawanan iti poot.
Inpakaammo ni Ancheta a segun iti pamilya ni Dizor ket naminduwan isuna a na-istroke.
