Pulis idiay Abra a maipatulod kuma idiay Basilan, nagresign

VIGAN CITY- Pinatalgedan ti Abra Police Provincial Office a maysa a pulis a nakabase idiay Tayum Municipal police station iti maysa kadagiti maipatulod kuma idiay Basillan ngem pinili na iti naglosolos.
Segun kenni Police Sr. Supt Alexander Tagum, provincial director ti Abra PPO, idi lunes ket nagresign ni P03 Allen Benedito gapu ta kaykayat na a makadwa ti potot na nga agtawen ti pito nga agsagsagaba ti cancer ngem iti maiyadayo .
Ni Benedito ket nagapu idiay Police Regional Office 3 partikular idiay Pampanga ngem naiyakar idiay probinsiya ti Abra idi 2016.
Naammuan nga adda iti record ni Benedito iti Philippine Drug Enforcement Agency gapu iti mapapati a paangbalin na a drug protector idi nakadestino idiay PRO-3.
Maipalagip a manipud kadagiti tallo gasut sangapulo a pasaway a pulis a maipatulod kuma idiay Mindanao ket lima pulo ket uppat laeng kadakuada iti nagtungpal iti baro nga assignment.