VIGAN CITY – Natay ti maysa a pulis ta aksidente a napaltoganna ti bagina idiay Bangued, Abra.
Nabigbig ti natay a ni Pol. Corporal John Paul Ayon-ayon, agtawen iti tallopulo a taga-Brgy. Napo, Sto. Domingo, Ilocos Sur a na-assign idiay Abra Provincial Police Office.
Iti pannaki-uman ti Bombo Radyo Vigan ken ni PCol. Mali Cula, Provincial Director ng Abra PPO, bayat nga adda iti motorpool iti Abra PPO ti biktima kaduana dagiti dadduma pay a pulis ket napanunotanna a dalusan ti paltogna a Caliber 9mm Taurus ngem aksidente a nakalbitna ken naiputok kenkuana.
Segun ken ni Cula, naitama ti bala iti barukong ti biktima ket nagpangto agingga iti tenggedna isu a naitaray iti Abra Provincial Hospital ngem natay bayat a matamtaming.
Iti agdama, maimimbestigaran iti pasamak nu adda napasamak a foul play iti pannakatay ti nasao a pulis.
Saan met a maawat ti pamiliana ti napasamak ta saanda a namnamaen iti insigida a pannakatay ti biktima.
Segun ken ni Elsie Ayon-ayon nga ina ti biktima, pinasingkedan ti manugangna a napaltogan ti anakna ket pinanunotna pay nga adda nangpaltog ngem naamoanna met lang nga aksidente a napaltoganna ti bagina.
Nasakit ken ni Elsie iti pannakatay ti anakna ta idi laeng September 10 iti agdama a tawen a bimmisita ni John Paul ditoy probinsia ken inkarina pay nga agsublinto manen ngem saanen a mapasamak pay.
