Impaganetget ni Philippine National Police Chief Gen. Nicolas Torre III a kasapulan ti naan-anay a panangbaliw iti aktwal a trabaho dagiti pulis tapno masigurado nga epektibo ti serbisyoda.
Iti umuna a flag raising ceremony-na kas baro a mangidaulo ti PNP, nadakamatna a saan nga umdas ti kinaadu ti report ta masapul nga adda nalawag a resibo iti aktwal a panagarestar, nangruna kadagiti awan ti warrant-na.
Binilin ni Torre ti Directorate for Personnel and Records Management nga iraman iti affidavit of arrest iti performance metrics dagiti pulis, nga isu pagibasaran iti promosyon, nangruna kadagiti patrolman ken sergeant.
Innayonna a bigbigen ti PNP dagiti pulis a pudno nga agtigtignay kontra iti kriminalidad, saan laeng nga iti papel no di ket iti aktwal a serbisyo.
