Nadagdagsen pay ti trabaho dagiti mangisursuro kadagiti pampubliko a pagadalan kalpasan a nairamanda iti pannakaipatungpal ti Academic Recovery and Accessible Learning o ARAL Program at Summer Remediation Program maibasar iti guidelines nga inruar ti Department of Education.
Impaganetget ni ACT Teachers Partylist Rep. Antonio Tinio a maikontra daytoy iti kari ti ahensia iti budget deliberation idi napan a tawen.
Segun ken ni Tinio, inlabanda ti P8.96-B a pondo para iti programa tapno maka-hire ti DepEd kadagiti tutor, makaited kadagiti materyales ken training, ken nasayaat a sueldo ngem no kastoy ti sistema ket kasapulan nga ilawlawag ti DepEd no kasano nga aramatenda ti pondo.
Nupay kasta, karaman dagiti mangisursuro kadagiti pampubliko a pagadalan a mangasikaso iti nasao a programa mangrugi inton bigat agingga Hunyo 2 kagiddan ti panagsagsaganada iti panangrugi ti Academic Year 2026-2027.
