VIGAN CITY – Nagpalagip ni Provincial Tourism Office Administrative Assistant Chester Adona a “first come, first serve” basis ti mayuswat a “Passport on Wheels” inton May 23-26 idiay Provincial Farmers Livelihood Development Center iti oras ti alas nuebe iti bigat agingga alas kuatro iti malem.
Segun ken ni Adona, masapul a siguradwen a naitugot dagiti requirement tapno saan a masayang ti panagpila.
Sangaribo dua gasut ti slot nga inted ti Department of Foreign Affairs para iti mayuswat a “Passport on Wheels” ket iti kada aldaw, ma-cater ti tallo gasut nga aplikante tapno saan nga agdudupudop dagiti mapan iti legislative building.
Masapul a maited ti valid e-mail address ta isunto ti panagipatulodan ti DFA iti reference number a pagbayadan kadagiti authorized payment partners kas ti Western Union, GCash, Villarica, Bayad Center, 7Eleven, ken Robinsons Business Center.
PHP1,200 ti maisagana para iti processing fee idinto a ti June 15-16 ket adda mabayadan a PHP150 para iti shipping fee-na.
Sangapulo ket lima nga aldaw ti target working days-na wenno aldaw a panangiyuray sakbay a maawat ti pasaporte.
Prayoridad ti nasao a programa dagiti residente iti Ilocos Sur ken nainget a maibilin a masapul ti presensya ti kada aplikante.
