VIGAN CITY – Pinasingkedan ni Abra Vice Governor Joy Bernos a saan pay laeng a mabalin nga ag-operate iti provincial hospital iti Abra ta saan a natalged kasaruno iti napasamak a ginggined.
Iti pannaki-uman ti Bombo Radyo Vigan ken ni Bernos, uray pay ti OPD ket saan a natalged isu a masapulda pay a patibkeren iti istuktura iti ospital ta adda dagiti narpuog a pasetna.
Nupay kasta ket kinunana met nga agtultuloy iti serbisyo iti provincial hospital babaen kadagiti district hospital nga isu iti nakaiyakaran dagiti pasyente a saan pay a na-discharge.
Inlawlawagna a kadagiti met addaan ti severe cases ket ire-referdan iti La Union Regional Hospital.
Kabayatanna, adu iti naapektaran iti ginggined kadagiti agduduma nga ili iti nasao a probinsia kangrunaanen kadagiti kalsada, rangtay ken residential buildings.
