VIGAN CITY– Nakapongtot ni Ilocos Sur governor Ryan SIngson iti iseserrek dagiti nasurok 100 a Chinese ken Taiwanese nationals a nakemmeg idiay San Viciente gapu iti pannakainaig da ti telecom fraud.
Iti pannakiuman ti Bombo Radyo Vigan kenni Singson, pagpalawagen na ni Ilocos Sur Police Provincial Office (ISPPO) Provincial Director PSSUpt. Jovencio Badua Jr., no apay a saan da a namonitor ti iligal nga aktibidad dagiti gangannaet a nangipaay iti dakkel a pakababainan iti probinsiya.
Nasdaaw pay ti gobernador no apay a saan nga ammo dagiti otoridad iti kaadda dagiti ginasut nga undocumented a gangannaet nga agnanaed iti maysa laeng nga ili.
Maipalagip a malaksid kadagiti suspek ket nakumpiskar dagiti otoridad dagiti ginasut a telecommunication gadfgets ken nadumaduma a gamit iti panangsukimat da ti dwa a lugar idiay San Vicente a mausar nga ebidensiya kontra kadagiti suspek.
