VIGAN CITY – Kumarkaro ti mapaspasamak a protesta idiay Sri Lanka ita a saan pay laeng a nagun-od dagiti agprotprotesta ti gagemda a mangipaikkat iti presidente a ni Gotabaya Rajapaksa.
Iti pannaki-uman ti Bombo Radyo Vigan ken ni Bombo International Correspondent Zeny Verdillo Gadut nga adda idiay Sri Lanka, inaldaw ken rinabii ti kaadda dagiti agprotprotesta nga aglalaaw ken agig-iggem iti plakard.
Awan ti pakarikutanda iti sueldoda ta saan met a naapektaran ngem ti laeng parikut ket ti kinangina dagiti magatang ken agkurkurang dagiti dadduma a suplay kas kadagiti taraon isu a mapilitanda nga ag-panic buying.
Malaksid ti suplay iti taraon, saan pay a kankanayon nga adda ti gasolina isu nga no adda ket pilpilaan dagiti konsyumer.
Kabayatanna, plano ti oposisyon inton Huebes, aldaw ti parliament day nga imbestigaranda ti presidente nga agingga iti agdama ket saan pay laeng a nagparang iti telebisyon.
Nupay kasta, awan pay ti Pilipino a kayatna ti agpa-repatriate idiay Sri Lanka, kas pinasingkedan ni Gadut.
