VIGAN CITY – Inlawlawag ni Provincial Health Officer Dr. Carmelita Singson nga awan iti rumbeng a pagdanagan dagiti agindeg ditoy probinsia kadagiti ar-aramiden dagiti local government units nangruna iti pannakai-quarantine dagiti tattao nga aggapu kadagiti pagilian a naapektaran ti coronavirus disease 2019.
Segun ken ni Singson, dagiti addang nga ar-aramiden dagiti LGU ket paset iti bilin ni Gov. Ryan Singson tapnu maliklikan iti pangwaras ti COVID- 19 ditoy probinsiya ta masapul a mapainget ken mabantayan a naimbag dagiti sumangpet ditoy probinsiya tapno saan a maakaran dagiti tattao no adda man kadakuada iti agpositibo iti nasao a virus.
Dayta ket mainaig pay laeng iti agwarwaras a damag nga adda dagiti naggapu kadagiti pagilian nga apektado ti COVID- 19 nga agseself-quarantine idiay Narvacan.
Innayon na nga awan dagiti persons under investigation ditoy probinsia no di ket dagiti laeng persons under monitoring iti pinaliiw da ngem kunana ket awan pulos iti nakitaan iti sintomas kadakuada isu a kiniddaw na iti publiko a dagiti laeng usto nga impormasyon iti ibaga da tapnu saan nga agdanag iti publiko.
