Kinarit ni House prosecutor ken Bicol Saro Party-list Representative Terry Ridon ni Vice President Sara Duterte a personal a tumabuno iti impeachment trial ita nga aldaw tapno maidatag ti ebidensia mainaig iti Artikulo II wenno ti alegasion ti saan a mailawlawag a kinabaknangna.
Segun ken ni Ridon, napateg nga agparang ni VP Sara ta idatag ti prosekusyon dagiti dokumento ken testimonia mainaig ti unexplained wealth ti pamilia Duterte.
Iti las-ud ti tallo a bulan ken maika-23 nga impeachment trial ket saan pay pulos a timmabuno ti bise presidente.
Impresentar ti prosecution ti nasurok a 1,800 a pinansial a dokumento ken testimonia dagiti sumagmamano a resource persons, agraman dagiti rekord dagiti transaksion iti bangko ken dadduma pay a pinansial nga interes ti pamilia.
