Kayat ti House prosecution panel a ni Vice President Sara Duterte mismo ti agbalin a testigo iti impeachment trial.
Saandan nga iparang ti nabatbati a 15 a testigo para iti Article 1 mainaig iti mapapati a saan a husto a panagaramat iti confidential funds.
Segun ken ni Atty. Lorna Kapunan, napateg ti testimonia ni Duterte iti amin nga uppat nga Articles of Impeachment.
Saanda pay laeng nga agkiddaw iti subpoena ita ken planoda a paayaban kalpasan ti pannakaiparang amin dagiti Articles of Impeachment.
Nupay kasta, kinontra ni Atty. Shiela Sison, lead counsel ni VP Sara ti plano ket dinakamatna ti Constitutional provision a nakailanadan a maiparit ti akusado a tumestigo iti bukodna a trial.
Segun ken ni Sison, ireserba ti defense team ti karbenganda nga agkomento iti oras a maipila ti pormal a mosyon wenno request tapno paayaban ni Duterte.
