Inyanunsio ni Lead Prosecutor Gerville Luistro a saanen nga ipresentar ti House prosecution panel ti sumagmamano a nakatuding a testigo iti impeachment trial ni Vice President Sara Duterte.
Daytoy ket adda pakainaiganna iti impeachment Article IV wenno ti maipagarup a panagpangta ti bise presidente iti First Family.
Karaman kadagiti saanen a maipasango ti mangibagi manipud iti Philippine National Police Firearms and Explosives Office (PNP FEO), journalist a da Mikhail Flores ken Bonz Magsambol, Sheriff Abe Andres, maysa a kabagyan ti biktima ti panagpangta ken maysa a psychiatrist.
Segun ken ni Luistro, ni National Bureau of Investigation (NBI) Director Melvin Matibag ti maudi a testigo ti prosecution para iti Article IV.
Ti testimonia ni Matibag ti manamnama a mangted ti kabuklan a panangipalawag ti pangta iti biag ni Presidente Ferdinand Marcos Jr., First Lady Liza Araneta-Marcos, ken dati a House Speaker Martin Romualdez a nakaipalaon iti impeachment complaint.
