Nagkedked ti House private prosecutor a ni Atty. Amando Virgil Ligutan iti saludsod ti depensa maipanggep iti naipakita a video clip bayat a maisaysayangkat ti cross-examination iti testigo ni NBI-BARMM Regional Director Atty. Jeremy Lotoc iti maikalima nga aldaw nga impeachment trial ni Vice President Sara Duterte.
Bayat a salsaludsoden ti abogado ti depensa a ni Atty. Mark Vinluan ni Atty. Lotoc, naipakita ti maysa a video clip manipod online press conference ni VP Sara idi November 2024, a nagbalin a sentro iti imbestigasyon iti NBI Cybercrime Division maipanggep iti mapapati a pangta iti biag ti presidente.
Insaludsod ni Atty. Vinluan iti testigo no masiguradona a dagiti sarita ni VP Sara iti press conference ket pudno a napasamak iti biag?
Insigida met a nag-object ni Atty. Virgil Ligutan iti nasao a panagsaludsod iti depensa.
Kinuna ni Atty. Ligutan a ti testigo ket not competent tapno sungbatan no dagiti dinakamat ni VP Sara iti video, kas kadagiti alegasyon ti korapsyon ket pudno a mapaspasamak iti pudno a biag.
Ti sakup laeng iti ammo ti testigo ket ti NBI investigation ket ti kinapudno a sinarita ken inibbatan ni VP Sara a sarita iti video, ngem saan a ti kinapudno iti likod dagiti alegasyon nga ibagbagana.
