Nagipasa da House majority leader Sandro Marcos ken House Speaker Bojie Dy ti House Bill no. 10431 wenno Sariling Kuryente Act a ti gagemna ket maikkatan dagiti adu a permit ken dadduma pay a proseso para kadagiti pamilia ken negosio nga agaramat iti rooftop solar panel ken battery storage para iti bukod a panagkonsumo.
Iti nasao a singasing, saanen a kasapulan ti pammalubos manipud iti Energy Regulatory Commission para kadagiti addaan iti bukod a non-exporting power system a saan a mangipatulod iti koriente iti distribution grid.
Maiparit met dagiti distribution utilities nga agsapul iti nayon a permit, bayad, wenno pannakasukat ti metro para kadagiti kualipikado a sistema.
Dagiti sistema a mangilaklako iti sobra a koriente iti grid ket agtalinaed a masakupan dagiti agdama a pagannurotan, ken dagiti utilities ket masapul nga agtignay iti aplikasion iti uneg ti 10 working days.
No bilang agbalin a linteg, mangipaulog ti DOE kadagiti pagannurotan iti panangipatungpal iti uneg ti 90 nga aldaw, ken epektibo ti linteg 15 nga aldaw kalpasan ti pannakaipablaakna.
