VIGAN CITY – Naikkat iti serbisyo ti project staff ti kapitolyo-probinsia a karaman a naglabsing kadagiti maipatpatungpal a protocol bayat ti pannakaisakup iti Enhanced Community Quarantine ti sangapulo ket siam nga ili ken dua a siudad iti Ilocos Sur.
Segun ken ni Gov. Ryan Singson, ti pannakatiliw ti nasao nga empleyado ti Provincial Government of Ilocos Sur a napan iti baybay iti disoras ti rabii ket mangipakita a seryoso ti pannakaipakat dagiti protocol ta siasino man nga aglabsing ket madusa.
Nupay kasta, kiniddaw ti gobierno-probinsia ti pannakitinnulong dagiti umili tapno malabanan ti Covid19.
Maipalagip nga idi September 28, 2021 iti alas dos singkwenta iti parbangon ket nakemmeg dagiti nagdidigos iti kabaybayan ti Brgy. Paratong, Sta. Catalina nga isu da Princess Agbulos, agtawen iti duapulo ket maysa, Project Staff ti Provincial Capitol a taga-Poblacion Norte, Santiago ngem agnaed ita iti Brgy. Balaleng, Bantay; Carl Jarren Belandres, agtawen iti duapulo ket dua a taga-Brgy. Poblacion; ken ni Sara Arcala, agtawen iti duapulo ket tallo, a taga-Brgy. Salindeg, Vigan City, Ilocos Sur.
