VIGAN CITY – Sangapulo a paltog ti naisuko idiay Cabugao Municipal Police Station idinto ta tallo ti naideposito iti pannakayuswat ti Project PALTIK wenno ti Proactive Campaign Against Loose Firearms Towards Transforming and Illuminating the Key Players of the Community a ti gagemna ket maisuko dagiti loose firearms ken maideposito dagiti expired ti lisensyana.
Segun ken ni P/Maj. Juan Jhayr Maggay, Officer-in-charge iti Cabugao Municipal Police Station, balligi ti proyektoda babaen ti pannakitinnulong ti Local Government Unit ken dagiti nadumaduma a stakeholders a nangawat ken nangsuporta iti nasao a ganuat.
Inallukoy dagiti pannakabagi ti linteg dagiti residente nga isukoda dagiti igam babaen ti panangipakaawatda a saan a nasayaat ti agik-ikot ti saan a lisensyado a paltog ta mabalin a mangitunda iti saan a nasayaat a pasamak.
Dagiti naisuko a paltog ket maidalan iti forensic examination tapno masigurado a dagitoy nga armas ket saan met laeng a nausar kadagti firearm-related incident.
