VIGAN CITY – Nangiparuar ni Gov. Ryan Singson iti executive order a mangituding iti price ceiling ti live weight a baboy a saan a nangin-ngina ngem iti PHP170 kada kilo iti uneg ti innem a pulo nga aldaw.
Dayta ket kalpasan ti arungaing dagiti konsyumer iti agtultuloy a panagngina iti presyo ti karne ti baboy.
Iti pannaki-uman ti Bombo Radyo Vigan ken ni Provincial Board Member Efren Rambo Rafanan, Committee Chairman on Agriculture, gagem ti paglintegan a makontrol ti nangina a presyo ti karne ti baboy ken dagiti mananggundaway nga agilaklako agsipud ta iti 2nd district ti probinsia ket immabot iti PHP340 kada kilo ti karne ti baboy.
Gapu ti dayta, nangisayangkat ti public hearing dagiti Sangguniang Panlalawigan ti Ilocos Sur tapno pagpapatangan ti parikut ket naikiddaw iti gobernador a matignayan nga insigida ta no saan ket posible a linawas nga agtultuloy ti nangina a presyo.
Nabilin dagiti Local Government Unit iti probinsia a mangipatungpal iti nasao a paglintegan ken mangbantay no sursuroten met laeng dagiti agtagilako.
