Mabalin a mangipatungpal ti flexible work arrangements dagiti pribado a kompania no laketdi adda tulagan ti employer ken empleado kas pinasingkedan ti Department of Labor and Employment (DOLE).
Segun ti DOLE, palubosan ti linteg iti aniaman a work rotation agingga agtulag dagiti dua a biang.
Kinuna ni DOLE Bureau of Working Conditions Director Alvin Curada, nabayagen nga adda policy para iti adaptation iti alternative work arrangement ken flexible work arrangement.
Pinasingkedanna pay ti sumagmamano a wagas tapno maipatungpal ti four-day workweek a saan a maapektaran iti mismo a trabaho, sueldo wenno benepisyo iti empleado.
Marugian inton bigat March 9, ti temporaryo a four-day week dagiti opisina iti ehekutibo kas addang tapno makatiped iti panagkonsumo iti langis iti baet iti panagpangina ti presyo dagiti produkto petrolyo.
