Posible a ngumina ti presyo ti liquefied petroleum gas (LPG) kadagiti sumarsaruno nga aldaw gapu iti kimmaru a tensyon idiay Middle East.
Segun ti LPG Marketers Assosication (LPGMA), mapatta-patta a P27.50 ti posible a mainayon a presyo iti kada 11-kilogram nga LPG cylinder wenno katukad ti nasurok-kumurang P2 kada kilo.
Iti baet nga awan pay ti official price adjustment ti Department of Energy, kinuna ti LPGMA a ngimmina ti presyo iti LPG iti world market gapu iti kumarkaru a riribok idiay Middle East.
Segun ken ni LPGMA Founder ken Chairman Arnel Ty, naapektaran ti presyo kalpasan a naaddaan ti tensyon ti nagbaetan ti United States ken Iran, a makaapektar iti world supply iti LPG.
Gapu dayta ket kinuna ti grupo a narigat pay a maaddaan ti rollback iti presyo iti LPG kadagiti sumarsaruno a bulan kangrunaan ket mangrugin ti winter stockpiling iti sabali a pagilian.
