VIGAN CITY – Nangin-ngina ita a gundaway iti presyo ti ipon ta umabot iti innem a gasut agingga pitogasut a pisos kada kilo ta basbassit ita iti naala nu yarig iti maal-ala idi kallabes.
Segun ti agtagilako a ni Dona Abanis a taga-Pandan, Caoayan, umabot iti P11,000 agingga P12,000 iti kada lata iti panananggatangda iti ipon isu nga uray nangina ket nagpatinggada laeng idi rabii P600 kada kilo iti kalakaan.
Ti tunggal lata ket saan nga agpapada iti kilona ngem masansan nga umabot iti sangapulo ket siam agingga duapulo a kilo.
VC – DONA ABANIS
Adda met dagiti adu latta iti ginatangda uray nangina ta ammoda a seasonal laeng iti nasao a taraon ken ammoda a narigrigat ita a kanito iti panagala iti ipon ket adda nangala pay iti nasurok tallo a kilo para iti kanenda ken iti dadduma ket ipatulodda iti ballasiw-taaw.
Maipalagip a nangrugi iti bulan iti Setyembre iti panagruar iti ipon ket agtapos ita a bulan iti Enero.
