Posible a ngumina ti presio ti kape iti Pilipinas gapu iti bumab-baba a lokal a produksion, panagpangina ti imported coffee beans ken nangato a gastos iti shipping, segun iti Philippine Coffee Board Inc. (PCBI).
Pinasingkedan ni PCBI spokesperson Ceasario Kapunan a mabalin a saan nga umabot iti 30,000 metric tons ti produksion ti kape iti pagilian ita a tawen gapu iti epekto ti El Niño ken panagpangato ti gastos iti produksion.
Gapu dayta, posible nga agpangina ti presio dagiti mainom a kape ken agbaliw ti coffee blends dagiti café, kangrunaan dagiti babassit a negosio a marigrigatan a makigiddan iti dadakkel a coffee chains.
Iti agdama, umabot iti P650 kada kilo ti imported Brazilian coffee beans, P700 agingga P750 ti Arabica beans, ken umab-abot met iti P900 kada kilo dagiti dadduma a lokal a beans manipud Benguet.
