VIGAN CITY – Saan nga idurduron ni Presidente Rodrigo Duterte iti pannakapawayway ti Martial Law idiay Mindanao ngem nu kiddawen dagiti local government official, nangruna dagiti mayor ken gobernador kenkuana, saan nga agpangadua a mangpabor iti kalikagum da.
Ti panagsarita ni Presidente Duterte iti inagurasyon iti baro a by-pass road ti Candon City, inbaga na a ti Mindanao ket maysa kadagiti kadakkelan a parikot na ken posible nga isun to pay laeng iti parikot dagiti sumar-saruno kenkuana a presidente iti pagilian isu a nu kiddawen kenkuana dagiti mayor ken gobernador a mapawaywayan ti Martial Law idiay Mindanao, insigida nga aprubaran na tapnu agtalinaed iti kappia ken talna iti rehiyon.
Idi Martes, inbaga ni National Security Adviser Hermogenes Esperon Jr nga insingasing na iti makatawen pay a martial law extesnion gapu iti agtultuloy a rebelyon wennu riribok iti nasao a rehiyon.
May 2017 idi indeklerar iti presidente ti Martial Law idiay Mindanao gapu ti napasamak a lima bulan a rinnupak idiay Marawi City nga aramid dagiti ISIS –inspired Maute terror group ket inton December iti agdama a tawen nga agpatingga, depende nu umanamong ti Kongreso a mapawaywayan manen.
